Молитва первая:
«Господи Боже наш, не вниди в суд с рабы Твоими, и огради нас от губительнаго поветрия на ны движимаго. Пощади нас смиренных и недостойных рабов Твоих в покаянии с теплою верою и сокрушением сердечным к Тебе милосердному и благопременительному Богу нашему припадающих и на милость Твою уповающих. Твое бо есть, еже миловати и спасати ны, Боже наш, и Тебе славу возсылаем, Отцу и Сыну и Святому Духу, ныне и присно и во веки веков. Аминь».
Молитва вторая:
«Господи Боже наш, услыши ны, грешныя и недостойные рабы Твоя, с высоты святого престола Твоего, благость Твою грехами своими прогневавших и милосердие Твое от себе удаливших. Не взыщи с рабов Твоих, и отврати страшный гнев Твой, праведно на ны движимый, утоли пагубное наказание, отрыни меч Твой страшный, невидимо и безвременно нас поражающий, и пощади убогия и слабыя рабы Твоя, и не обрекай на смерть души наша, в покаянии прибегающия с сокрушенным сердцем и со слезами к Тебе, Богу Милосердному, мольбам нашим внимающему и покаяние подающему. Яко у Тебе Единого милость и от Тебе спасение, Боже наш, и Тебе славословие приносим, Отцу и Сыну и Святому Духу, ныне и присно и во веки веков. Аминь».
